Fasnacht Gnepf 2019 - «Es war einmal…und isch no hyt eso»

Zeedel Gnepf 2019 (als PDF)

VERSCHNUUFFER GNEPF ZEEDEL 2019

Sujet: "Es war einmal…und isch no hyt eso"

Wär kennt si nit, die ganzi Gschicht
Vo Prinze, Häx und Bösewicht
Vom Guete, wo trotz Widerstand
Am Schluss ka gwinne d Oberhand
So Määrli hän ys dröime loo
Und das isch no hit esoo
Dorum isch au d Gschicht beliebt
Vom Traumprinz, wo sich schwär verliebt
Harry Windsor isch sy Namme
Und Meghan heisst sy Härzensdame
Was zwüschen ihnen isch bassiert
Das hän mir do genau notiert:

Spieglein, Spieglein an der Wand
Wär isch die Scheenscht im ganze Land?
Fir dr Harry isch es glaar:
Es isch my Schauspiil-Superschtaar
D Meghan uss den USA
lsch e Draum fir jeede Maa
So nimmt är denn sy ganze Muet,
En edlen Aazug und e Huet
Und stellt die gröschti Froog vo alle:
,,Duen ych dir au schampar gfalle?
Willsch du e Prinzässin wärde
Im töllschte Kingdom uff dr Ärde?"
Dr Meghan ihri Auge blingge,
Fascht kippt si ruggwärts us de Fingge
„Harry, du bisch wien e Frosch
Nur wenn di vo mir küsse losch
Kasch du e Keenig syy, e rächte,
E weise, noble und gerächte.
Y will an dyner Site stoo
Und gib dir dorum hit mi ,Jo'!"

Die frohi Kund wird bald verbraitet
Und d Royal Wedding vorberaitet
Pfarrer, Glaider, Garde, Kueche
Nur s Allerbeschte duet me bueche
Dä Hype erfasst nit nur GB,
Nai, die ganzi Wält will's gsee
Au s SRF stellt s Brogramm umm
E Mänge frogt sich schüüch: worum?
Es isch jo gwiss e scheeni Sach
Aber bruucht's dä ganzi Grach
Um die verstyffti Prozessioon?
Was mir vermissen isch d Passion
Still hogge die zwai uff em Sitz
Gar kai Blatz het's fir bitz Witz
S Brotokoll isch striggt und glaar
Und nit im Aasatz wandelbaar
Bim Luege frogsch dy mittedinn:
Isch das no menschlig, macht das Sinn?

Wenn alles so perfäggt muess syy
Ändere sich d Ablöif glyy
An dr Wedding zwanzig drissig
Schaffe d Ääscheniöör scho flyssig
Si finde's nämlig nit zem lache
Ass Mensche so oft Fähler mache
Drum stoot in baar Joor im Brogramm
E Roboter als Brütigamm
Vergliche miteme normale Maa
Mag är jo sini Vorteil haa:
Am Morge stoot är sehr frieh uff
Und uff sym Schrybdisch herrscht kai Buff
Är schmatzt nit tut bim Gala-Ässe
Het an Nazi-Goschdym kai lnträsse 
Dr Walzer-Tanz macht ihm kai Mieh
Är kunnt nie z spoot und au nie z frieh
Und nääbebyy, als wär's kai Sach
Zitiert är Shakespeare und spiilt Bach
Kurz gsait: Är isch e sone Maa
Wie me sich ihn nur wünsche kaa
Und trotz all däm, doo sin mr ehrlig
Fände mir das gar nit heerlig
Wenn sone Keenig wurd regiere
Mr wurden ys jo fascht scheniere
Drum wänn mir jetz die Zyt no gniesse
Wo au e Prinz e Bock ka schiesse

Harry, blyb so wie de bisch
Iss au mol ame Donnschtig Fisch
Nimm e zwaits Stügg Schoggikueche
Und wenn di uffreggsch, due mol flueche
Bhalt die Kanten und die Egge
Zeig si stolz, statt si z verstegge
verbieg di uff kai Fall zue sehr
Wenn's dir nit passt, denn stell di gweer
Wie wichtig mol e Gränzen isch
Weisch oft ersch, wenn de drüber bisch
Drotz Fähler gheersch nie zu de Schwache
Solang dy Frau mit dir ka lache
Nur dreu muesch ihren immer syy
Schunsch handlisch dir e „Meghxit" yy!

Verschnuuffer Gnepf 2019