Fasnacht 2018 - «Swiss Hacker Army»

VERSCHNUUFFER STAMM ZEEDEL 2018

Sujet: "SWISS HACKER ARMY"

Es fliege wältwyt heftig d Fätze.
denn an der Macht sin grad die Lätze:
Es sin die Trump-el und Despote
kuum z unterschaide vo Idiote.
Wie d Tier dien sy mit Drohgebaare
D Bedrohig globaal uffefahre.
sy blöffe, wär der grösser … het - 
fir s atomari Waffe-Set 
und klopfe uf e Buuch, wie d Affe –
der Intelläggt gilt nid als Waffe.
Wenn das Getue so wytergoot
isch unser Staatebund bedroot.

Dernäbe git s syt vyyle Joor
der sehr bedroolig Cyberwar.
Dä lauft ganz lyyslig, fies und still
und wär dergeege aakoo will
muess sälber so-n-e Unit ha,
wo d Malware prompt abweere ka.
Hesch die emool in Dym Systeem
no het Dy Staat e rächts Probleem:
Es isch d Verwaltig so scho z laam
und kunnt derzue e Wälle Spaam
no lauft grad gar nyt meh, wie s muess!
Das syg scho jetzt so? – Schöne Gruess!

Wenn D richtig Päch hesch, ka s bassiere,
dass Hacker bi Dir infiltriere
bevoor de d Füürwand kasch go wäggsle -
no kasch Dy Compi grad go häggsle.
Wenn Dir so Mischt privat bassiert
isch nid grad glyych vyyl deschtruiert,
wie wenn e ganze Staat drii lauft,
wo sich us däm Desaschter kauft,
vyyl Gäld und Prestige muess verliere,
zem d Katastrophe limitiere.

Dermit der Schwiz das nid passiert
het si grad sofort reagiert
und het d Swiss Hacker-Unit grindet,
wo alles glai hackt, wo si findet
es syg verdächtig oder lätz,
no kunnt die sofort grad in d Sätz.
Zem all däm Terror d Stirne biete
göhn mir mit unsere Äxt go wiete.
Mir trage Telle-Bärt im Gsicht
und fürchte numme s jüngschte Gricht!
Wär no der Schlacht sich stärgge muess,
griegt Hörnli, Ghackts und Öpfelmues!
S isch Morgarte so im Vergliich
e Yoga-Camp mit Öschterriich…

S het Hacke aber au sy Guets:
Em Trump sy Twitter-Account duets
fir kurzi Zyt eso blockiere,
dass är ys nid ka drangsaliere!

S het au das Wikileaks woorschyynlig
sy Guets, nur isch der Scheff sehr piinlig.
Drum luege mir vo dert ewägg
und butze nuur der aige Drägg.

D Regierig mechtsch zem Teil gärn wäggsle
und ainzelni dervo grad häggsle:
Der Wessels mecht me gärn entmachte 
und denn grad öffentlig go schlachte…

Mit Religioon het das nyt z tue
sunscht mieche mir der Laade zue.
Distanz zue Fundis tien mir waare
die kenne grad zem Deyfel faare!
Bevoor s System grad ganz verkracht
isch wichtig, dass me gschwind verwacht
und d Froog vo alle Frooge froggt,
wo zvorderscht uf der Zunge hoggt:
Was goot dä riise Mischt mi aa,
solang ich do mi Friide ha?
Mit däre Dänggwyys kunnsch nid wyt,
well s unsri Schwiz sunscht glyy nimm git!
Drum: Pagg Dy Axt, stand do in d Reihe
und kumm go s Übel aabemäije!

Verschnuuffer 2018